Naglar eru nauðsyn.

Ég held að margir þeirra sem tala hvað mest um nagladekkin lifi í heimi fordóma og þekkingaleysis. Ég er utan af landi og þekki nauðsyn nagladekkja af eigin raun. Þær aðstæður geta skapast að naglar séu algerlega nauðsynlegir og að bílar sem eru á svokölluðum heilsársdekkjum komast hvorki lönd né strönd.

Þeir eru margir sem fullyrða að svifrik sé af völdum nagladekkja, en gleyma því að mesta slit gatnakerfisins er að völdum saltburðar, og þá má taka fram að saltið er oft blandað vikursalla sem rífur göturnar niður, líka þegar naglalaus dekk troða á sallanum.

Þegar snjór er tekinn sem er 0°c heitur og í hann er blandað salt, getur hann frosið niður í allt að -20°c. Þetta er alkunna. Þegar yfirborð vegarins er fryst skyndilega skreppa steinefnin saman vegna hitaþenslu, losna frá asfaltinu og kroppast upp með umferðinni. Þegar steinefnin vantar aka bílarnir á tjöru sem eyðist mjög hratt.

Ef göturnar væru steyptar myndu þær endast án viðhalds í 20-30 ár og eru dæmi um steyptar götur hér á landi sem eru orðar 40 ára gamlar, og enn í fínu standi. Hvorki saltið né nagladekkin tæta þessar götur upp og er mér því spurn hvers vegna ekki er gert meira af því að steypa þungar umferðargötur eins og gert er í Þýskalandi, Bretlandi og Bandaríkjunum svo dæmi sé tekið.

Ég er ekki sammála þessu með falsa öryggið. Ég ek um á nagladekkjum á mínum bílum og mun gera það svo lengi sem ég hef til þess leyfi. Naglarnir hafa forðað mér frá árekstri oftar en einu sinni.

Hver bíll sem ekur á nöglum tætir upp tæpt hálft kíló af malbiki á heilum vetri umfram þá sem ekki aka á nöglum. Þeir naglalausu slíta líka malbiki. Hálft kíló er hálf mjólkurferna. Mér finnst hálft kíló af malbiki á ári ekki mikið mál ef börnin mín eru öruggari í bílnum hjá mér fyrir vikið.

Naglarnir gera bíla á þjóðvegunum öruggari og rásfastari, og þurfa ekki að bjarga mörgum mannslífum til að mér finnist þeir eiga fullan rétt á sér.

 

Tími nagladekkjanna er liðinn

Athugasemdir

[Davíð Gunnarsson, 17.4.2007 kl. 08:25]

Ef ekki heilsársdekk þá bara harðkornadekk eða loftbóludekk...eitthvað annað en þetta naglarugl og einstrengingslegar skoðanir á þeim.

[Scorpion (IP-tala skráð) 19.4.2007 kl. 00:25]

Mætti kannski benda Davíð á að það eru til vetrardekk. Skil ekki hvernig harðkornadekk eða loftbóludekk urðu eini valkosturinn á móti nagladekkjum. Nagladekk eru negld vetrardekk en ekki einhver sérkapítuli. Getur í flestum tilfellum fengið sömu dekk án nagla. Vil samt benda fólki á að leita sér ráða hjá óháðum hjólbarðaverkstæðum áður en það tekur ákvörðun um harðkornadekk eða loftbóludekk sem er bara vörulína frá ákveðnum framleiðendum. Bæði hafa sína kosti en einnig ókosti. Vil líka benda á að ef enginn æki á nagladekkjum hvernig á þá að brjóta upp malbikið svo grip fáist í dekkin ? Væri gaman að sjá útkomuna ef hálka myndaðist á rennisléttu malbikinu.