Hvað kostar hver fangi?

Þegar horft er til þess að hver fangi kosti samfélagið um kr. 150.000.- á dag þegar hann situr inni, má þá ekki búa til vinnu handa honum í stað þess undir lok afplánunar?

Það er örugglega betra að hann geri gagn utan múranna þar sem hann aðlagast samfélaginu, heldur en að láta hann dúsa inni og kosta ríkið 150.000 á dag fyrir að sitja þar.

Þó nú sé atvinnuleysi eru mörg störf óunnin sem fangar myndu örugglega frekar vilja vinna í stað þess að dúsa í fangelsi.

Áfangaheimilið Vernd hefur löngu sannað gildi sitt. Fangar  sem ekki hafa vinnu geta til dæmis þrifið landið, gróðursett, málað yfir veggjakrot, lappað upp á hús í niðurníðslu sem eru í eigu ríkisins og ýmislegt fleira.

Í dag er föngum veitt dagsleyfi við og við frá fangelsisdvölinni. Helgarleyfi er eitthvað sem ég sé fyrir mér. Enda eiga margir þeirra fjölskyldur.

Spurningin er hvernig við viljum að fangar séu þegar þeir koma aftur út í samfélagið. Viljum við fá niðurnídda einstaklinga sem hafa hvergi höfði sínu að halla, skítblankir og atvinnulausir, eða viljum við að þeir séu reiðubúnir að takast á við lífið og samfélagið á okkar forsendum?

Ég mælist til þess að ríkið og sveitafélögin skaffi þessu fólki það viðurværi sem til þarf svo það geti dvalið á áfangaheimilinu Vernd áfram. Það er afar mikilvægt að mínu mati.

 

Dvöl fanga á áfangaheimili í uppnámi

Athugasemdir

[Arnar Geir Kárason (IP-tala skráð) 26.1.2009 kl. 11:42]

Eru 150.000 krónur á dag ekki soldið ýktar tölur ???  Annars er ég alveg sammála þér í þessari grein að öðru leiti.  Ég skrifaði sjálfur einmitt svipaða færslu fyrir nokkru síðan.  Þá færslu geturu lesið hér

Áttu til einhverjar heimildir fyrir því að það kosti heilar 150 þús á dag að vista fanga væri gaman að sjá þetta sundurliðað 

[Baldur Sigurðarson, 26.1.2009 kl. 11:56]

Ég hringdi nú bara í Fjármálaráðuneytið og spurði hvað hver fangi kostaði þjóðarbúið á dag í heild þegar allt er tekið með í reikninginn.

Þetta var talan, og var þá tekið tillit til allra fangelsismála sem oft eru ekki tekin inn í reikninginn. Svo sem sjúkrakostnaður, tannlæknakostnaður, sálfræðiaðstoð, geðhjálp, lyfjakostnaður, endurnýjun búnaðar, flutningar til og frá landinu svo og flutningur innanlands, laun allra starfsmanna stofnunarinnar, laun fanga, greiðslur verktaka vegna sértækra verkefna, efniskostnaður, viðhald fasteigna og svo framvegis þannig að þegar öllu er á botninn hvolft er þetta talan sem ég fékk.

Mér fannst þetta líka ofboðslega hátt, en svona er þetta víst. Þess vegna finnst mér að það megi horfa meira til samfélagsþjónustunnar og áfangaheimilanna. Sumir fá að ljúka afplánun með því að fara í meðferð. Það er líka eitt úrræðið.

[Arnar Geir Kárason (IP-tala skráð) 26.1.2009 kl. 12:01]

Ok, ég er algerlega sammála þér í því að fanga megi nýta meira.  Það er engum gott að sitja og dúsa aðgerðarlaus.  Fyrir utan hvað það er slæmt ef að fangar hafa ekki atvinnu og eða fjármálin í ólagi þegar þeir ljúka afplánun.  Þá hafa þeir fá úrræði önnur en að halda áfram afbrotum.

[Baldur Sigurðarson, 26.1.2009 kl. 12:25]

Þar hittirðu naglann á höfuðið. Margir snúa að fyrri lifnaðarháttum því það eina sem bíður þeirra utan múranna eru gömlu félagarnir, neysla og fordómar samfélagsins, og jafnvel fordómar nánustu ættingja og vina.

[Arnar Geir Kárason (IP-tala skráð) 27.1.2009 kl. 11:09]

Áhugavert að sjá hvað Biblían hefur til málana að leggja en ég var að lesa þetta í gærkvöldi, skemtilegt hvað ég einhvernvegin virðist alltaf lesa efni tengt því sem er í brennidepli.

2. Korintubréf 2:5-9
⁵En ef nokkur hefur orðið til þess að valda öðrum hryggð, þá hefur hann ekki aðeins hryggt mig heldur að vissu leyti hryggt ykkur öll svo að ég geri ekki enn meira úr því. ⁶Látið þeim manni nægja þá refsingu sem allflest ykkar hafa veitt honum. ⁷Því ættuð þið nú öllu heldur að fyrirgefa honum og uppörva hann til þess að hann sökkvi ekki niður í allt of mikla hryggð. ⁸Þess vegna bið ég ykkur að sýna honum kærleika í reynd. 

En þarna er klárlega verið að segja að þegar menn hafa tekið út sýna refsingu þá eigum við ekki að refsa þeim lengur heldur styðja við bakið á þeim til þess að forða þeim frá frekari afbrotum.